تطبيق أصلي
مبني بـ Flutter، نفس التقنية البتستخدمها شركات كبيرة. سريع ويشتغل في أجهزة أندرويد كتيرة.
فكرتك تستاهل تطبيق حقيقي
اكتب نشاطك بلغتك، واستلم تطبيق أندرويد جاهز باسمك وشعارك، بلوحة إدارة وقاعدة بيانات آمنة. من غير ما تكتب سطر برمجة.
قريباً على Google Play
شوف كيف يعمل
شنو هو SUDAI؟
SUDAI منصة سودانية بتحوّل وصف نشاطك لتطبيق جوال حقيقي. ما قالب جاهز بتغيّر فيهو الاسم بس: كل تطبيق بيتكتب من جديد حسب الوصف البتعتمدو، بشاشاته وبياناته وصلاحياته، وبيمر بفحوصات تقنية قبل ما يوصلك.
- ملف APKتثبّتو في أي جوال أندرويد طوالي.
- ملف AABجاهز للرفع في Google Play باسمك.
- لوحة إدارةتضيف منتجاتك وأسعارك وتتابع طلباتك.
كيف بنبني تطبيقك
اوصف فكرتك
اكتب وصفك بنفسك، أو اختار وصف جاهز لنشاطك، أو خلّي مساعد SUDAI يسألك أسئلة قصيرة ويكتب معاك وصف دقيق.
شوف التصور مجاناً
قبل ما تدفع أي حاجة بتشوف تصور تطبيقك: الشاشات، والأدوار، والبيانات، ولوحة الإدارة. تعدّل فيهو لحدي ما يطابق فكرتك.
اختار طريقة الاستلام
استضافة عندنا ونحن نتابع التشغيل، أو ملكية كاملة تستلم فيها الكود وقاعدة البيانات في حسابك. السعر بيظهر واضح بالجنيه السوداني قبل البدء.
البناء والفحص
الذكاء الاصطناعي بيكتب كود تطبيقك بـ Flutter، وبعداك بيمر بتحليل واختبارات تلقائية. لو ظهر خطأ بيتصلح قبل التسليم، وإنت بتتابع المراحل لحظة بلحظة.
استلم تطبيقك
ملفاتك بتظهر في «مشاريعي»، وبيجيك إشعار في جوالك. تدخل لوحة الإدارة بإيميلك وكلمة المرور العيّنتها.
طوّرو متى ما دايِر
داير تضيف ميزة أو تغيّر شكل؟ اكتب طلب التعديل من جوالك، وبتستلم نسخة جديدة مع حفظ النسخ القديمة.
تطبيق حقيقي تعتمد عليه
نشاطك بيعتمد على التطبيق كل يوم، فالمطلوب إنو يشتغل صاح، ما إنو يبان حلو بس.
قاعدة بيانات حقيقية
منتجاتك وطلباتك وزبائنك محفوظين في قاعدة بيانات سحابية، ما في الجوال بس. ضاع الجوال؟ بياناتك موجودة.
أدوار وصلاحيات
المالك يشوف كل شي، والموظف يشوف شغله بس، والزبون يشوف طلباته بس. الحدود دي في قاعدة البيانات نفسها.
عربي كامل
واجهة من اليمين لليسار، والأسعار بالجنيه السوداني بفواصل الآلاف، ورسائل خطأ مفهومة.
بياناتك ملكك
تصدّر بيانات تطبيقك Excel أو CSV متى ما دايِر، وفي باقات الملكية تستلم الكود كامل.
متابعة بعد التسليم
عدّاد استهلاك يوضح ليك البيانات والصور والمستخدمين، وتنبيه قبل ما توصل حد باقتك.
بياناتك في أمان
- كل اتصال بالتطبيق والموقع مشفّر (HTTPS)، والبيانات محفوظة في قاعدة بيانات سحابية مشفّرة.
- كل تطبيق في مساحة معزولة: قواعد صلاحيات على مستوى قاعدة البيانات بتمنع أي حساب يشوف بيانات غيرو.
- كلمات المرور محفوظة بتشفير ما بيتعكس، وما في زول يقدر يقراها، حتى نحن.
- رمز الدخول من 6 أرقام بيشتغل مرة واحدة ولمدة قصيرة، وبيرسل لإيميلك بس.
- فريقنا يصل للبيانات اللازمة لشغلو بس، والإجراءات الإدارية الحساسة متسجّلة.
- ما بنبيع بياناتك، وما بنستخدمها للإعلانات، وتقدر تحذف حسابك متى ما دايِر.
سياسة الخصوصية
حذف الحساب
الشروط وسياسات البناء والتعديلات والاسترجاع موجودة كاملة داخل التطبيق في «حسابي ← السياسات والشروط».
ليه SUDAI وما مبرمج؟
المبرمج الشاطر كنز، وبنحترم شغلو. لكن لو إنت صاحب نشاط داير تطبيق يشتغل، الفرق في التجربة كبير:
الطريقة التقليديةمع SUDAI
قبل الدفعوصف شفهي ووعودتشوف تصور تطبيقك مجاناً
السعربيتغير مع الوقتواضح بالجنيه قبل ما تبدأ
التقدّمتسأل وتنتظر الردتتابع المراحل لحظة بلحظة
التعديلمشوار ومفاوضة جديدةطلب من جوالك وتستلم نسخة جديدة
الاستضافةعليك إنت تدبّرهاعلينا، أو تستلم الملكية كاملة
ولو مشروعك محتاج شغل خاص جداً، في التطبيق خدمة «استشر مبرمجك» توصلك بمبرمج حقيقي.
لكل شاب سوداني عندو فكرة
كم فكرة اتولدت في راس زول وماتت لأنو «التطبيق داير قروش كتيرة ومبرمج ووقت»؟ الدكان البيعرف زبائنو بالاسم، والكوافير المليان حجوزات في الورق، والبراند الصغير البيبيع في الواتساب. كلهم يستاهلوا تطبيق.
SUDAI اتعمل عشان المسافة بين الفكرة والتطبيق تبقى وصف تكتبو الليلة. ابدأ بالبتعرفو، والباقي علينا.
من نحن
مازن عثمان
مؤسس SUDAI ومطوّره، ومؤسس مجموعة SUD
SUDAI جزء من مجموعة SUD، ومعاه SUD Store. الفكرة بسيطة: نخلّي التقنية الحديثة في متناول أصحاب الأعمال السودانيين، بأدوات بالعربي وأسعار بالجنيه، وجودة ما أقل من أي منصة عالمية.
الأسئلة الشائعة
هل لازم أكون بعرف برمجة؟
لا. بتكتب وصف نشاطك بلغتك العادية، أو تختار وصف جاهز، أو تخلي المساعد يسألك. الكتابة بالعربي، والدارجة السودانية مفهومة.
التصور مجاني فعلاً؟
أيوه. بتشوف تصور تطبيقك وتعدّل فيهو قبل ما تدفع أي حاجة. الدفع بيبدأ بس لما تختار تبني.
التكلفة كم؟
باقات الاستضافة بتبدأ من $45 تأسيس و$20 شهرياً، ومعاها كريدت مجاني يغطي البناء. والملكية الكاملة بتبدأ من $499 دفعة واحدة. التفاصيل كاملة في صفحة الأسعار.
البناء بياخد كم؟
بيعتمد على حجم التطبيق. وإنت بتتابع المراحل من جوالك لحظة بلحظة، وبيجيك إشعار أول ما يكتمل.
بدفع كيف؟
بالتحويل البنكي، وبعداك ترفع صورة الإشعار من التطبيق، وفريقنا بيراجعو ويبدأ البناء.
أقدر أنشر تطبيقي في Google Play؟
أيوه. بتستلم ملف AAB جاهز للرفع، والتطبيق ما بيترفع لأي متجر إلا بتفويض صريح منك.
التطبيق ملكي؟
الفكرة والمحتوى والشعار ملكك. في باقات الملكية الكاملة بتستلم الكود وقاعدة البيانات في حسابك، وفي الاستضافة بنشغّلو ليك وبياناتك برضو ملكك وتقدر تصدّرها.
لو دايِر أعدّل بعدين؟
تكتب طلب التعديل من صفحة المشروع. الأخطاء المخالفة للمواصفات بتتصلح مجاناً، والإضافات الجديدة بتتحسب بالكريدت حسب حجمها.
بيانات زبائني وين بتكون؟
في قاعدة بيانات سحابية مشفّرة ومعزولة عن تطبيقات العملاء التانيين. إنت وموظفينك بس البتشوفوها حسب صلاحياتكم.
في نسخة آيفون؟
حالياً SUDAI بيبني تطبيقات أندرويد، والجزء الأكبر من جوالات السودان أندرويد.
الفكرة عندك، والتطبيق علينا
SUDAI قريباً على Google Play.
قريباً على Google Play